Արցախը Հայաստան է, և վերջ. Արայիկ Հարությունյան

Արցախի նորընտիր նախագահ Արայիկ Հարությունյանը, ստանձնելով նախագահի պաշտոնը, հանդես եկավ ելույթով։

ԵՐԵՎԱՆ, 21 մայիսի – Sputnik. Արցախը Հայաստան է, և վերջ։ Այս հայտարարությունն արեց Արցախի նախագահի պաշտոնը ստանձնած Արայիկ Հարությունյանը` ելույթ ունենալով Ազգային ժողովի հատուկ նիստում և կրկնելով դեռ նախորդ տարի ՀՀ վարչապետ Նիկոլ Փաշինյանի արած հայտարարությունը։

2019–ին օգոստոսի 5-ին Փաշինյանը Ստեփանակերտի Վերածննդի հրապարակում կազմակերպված հանրահավաքի ժամանակ հանդես էր եկել ծրագրային ելույթով և ասել, որ «Արցախը Հայաստան է, և վերջ»։

Այս հայտարարությանը հաջորդել էր ադրբեջանական կողմի բուռն արձագանքը։ Փաշինյանը վերոնշյալ թեմայով խոսել էր Գերմանիայում` Ֆրիդրիխ Էբերթ հիմնադրամում` պատասխանելով Բեռլինում ադրբեջանցիների համայնքի ներկայացուցիչների հարցերին։

«Երբ 28 տարի առաջ Արցախի համար կռիվ էինք տալիս, երազում էինք ունենալ միացյալ ու ազատ հայրենիք։ Այժմ նորանոր երազանքներին հասնելու ժամանակն է, մեծ երազանքների։ Ժամանակն է երազելու ու գործելու` ռազմական, տնտեսական հայրենիք կերտելու ուղղությամբ»,–ասաց Հարությունյանը։

Նրա խոսքով` խորհրդանշական է, որ ինքն Արցախի նախագահի պաշտոնը ստանձնում է պատմական Շուշիում` հաղթական մայիս ամսին։

Հարությունյանը հայտնեց նաև, որ Արցախի ԱԺ–ն Շուշի տեղափոխելու մտադրություն կա, և այդ ուղղությամբ քայլեր կիրականացնեն։

Արցախի նախագահի խոսքով` մի քանի հիմնական սկզբունքներ կան, որոնք ընդգրկված են լինելու իր գործունեության սկզբում։ Դրանցից առաջինը սահմանում է, որ մարդը բարձրագույն արժեք է, իսկ պետությունը` բարձրագույն արժեքին ծառայող հաստատություն։

Սկզբունքներից հաջորդն էլ այն է, որ միացյալ հայրենիքի անվտանգությունը, տարածքային ամբողջականությունը ենթակա չէ որևէ վերապահման և սակարկման։ Հարությունյանի խոսքով` Արցախի բնակչության գլխին կախված սուրը պետք է համարել յաթաղան` ողջ հայության գլխին։ Նախագահն ասաց, որ պատրաստ են այդ յաթաղանը վերածել բահի, գրչի, խաչի, իսկ անհրաժեշտության դեպքում` նաև սրի։

Հարությունյանը պատմեց` 1988-ի փետրվարի 13-ին իր մեծ եղբայրը` Սամվելը, իրեն հարցրել է, թե պատրա՞ստ է զոհվել հանուն հայրենիքի։ Հարությունը պատասխանել է` այո։

«Եղբայրս կատարեց իր երդումը, ես` դեռ ոչ»,–հուզված ձայնով ասաց Հարությունյանը։
Նշենք, որ արարողությանը ներկա էր նաև ՀՀ վարչապետ Նիկոլ Փաշինյանը։

Հիշեցնենք, որ ապրիլի 15-ին Արցախի Հանրապետության նախագահական ընտրությունների երկրորդ փուլի արդյունքներով նախագահ էր ընտրվել «Ազատ հայրենիք» կուսակցության նախագահ Արայիկ Հարությունյանը։

Երկրորդ փուլում նրա հետ մրցակցում էր արտգործնախարար Մասիս Մայիլյանը։ Իսկ առաջին փուլի քվեարկությունը կայացել էր մարտի 31-ին։

(Visited 605 times, 12 visits today)