25 կգ-ից ավել Ջավախքից ի՞նչ պետք է բերեն, որ իրենց խանգարի. Շիրակ Թորոսյանը՝ առանց մաքսազերծման ուղեբեռը կրճատելու որոշման մասին

Առանց մաքսազերծման ուղեբնեռերի սահմանափակումն, իսկապես, ջավախքցիների համար խնդիր է, բայց ոչ այնքան սուղ, որպեսզի այդ խնդրով պայմանավորված մեծ աղմուկ բարձրացնեն. Tert.am-ի հետ զրույցում ասաց «Իմ քայլը» դաշինքից պատգամավոր ընտրված, ծնունդով Ջավախքից Շիրակ Թորոսյանը:



Ըստ նրա` պատճառը պայմանավորված է Եվրասիական տնտեսական հանձնաժողովի որոշմամբ, ըստ որի՝  2019 թ. հունվարի 1-ից փոխվելու են առանց մաքսային վճարների ներմուծվող անձնական օգտագործման ապրանքների արժեքային և բնաիրային չափերը:

«Ինչքանով տեղյակ եմ, նման որոշումը պայմանավորված է ԵԱՏՄ շրջանակներում մեր ստանձնած մաքսային պարտավորությունների հետ, և եթե այդպես է, խնդիր կա, պետք է հասկանալ, թե ի՞նչ հնարավորություններ, ճանապարհներ կլինեն որոշակի լուծումներ գտնելու համար»,-ասաց նա:

Նշենք որ 2019 թվականի հունվարի 1-ից առանց մաքսատուրքերի ու հարկերի վճարման ներմուծվող ապրանքների արժեքային չափը կրճատվելու է 3 անգամ, իսկ կշիռը՝ 2 անգամ, այսինքն՝ ֆիզիկական անձինք կարող են իրենց հետ ունենալ մինչև 25 կգ քաշով անձնական օգտագործման ուղեբեռ, որի արժեքը չի գերազանցում 500 եվրոն։

Ըստ Թորոսյանի` խնդիրը ոչ թե վերաբերում է առաձին մարդկանց ուղեբեռներին, այլ ընդհանուր կարգավորում է:

«Եթե խոսքը վերաբերում է առանձին` մեկ մարդու հետ կապված խնդրին, իհարկե, այստեղ մտահոգվելու պատճառ գուցեև կա, բայց դա նաև այդքան սուր չէ, ինչպես թվում է, որովհետև ի՞նչ պետք է մարդը, կամ թեկուզ ուսանողը, Ջավախքից 25 կիլոգրամից ավելի բերի, որ իրեն խանգարի: Իհարկե, խնդիր է, բայց եթե ավելին է, կարող է ընկերոջ հետ կամ մյուս անձի հետ ով չունի բեռ, անցկացնել:

Ճիշտ է, դա լուծում է, բայց նաև խնդիր է և միգուցե պետք է այստեղ աշխատենք Մաքսային մարմինների հետ, և փորձենք լուծում գտնել, եթե իրենք ավելի հիմնավոր կներկայացնեն հնարավորությունները»,-ասաց նա: 

Շիրակ Թորոսյանը ենթադրում է, որ դժգոհ են հատկապես այն մարդիկ, ովքեր ոչ թե անձնական ուղեբեռ են բերում, այլ թեթև բիզնեսով են զբաղվում: «Եթե մարդը բիզնեսմեն է և  փորձում է սահմանի չեզոք գոտում կանգնել և 50 հոգի հրավիրել և 50 կգ-ով անցկացնել, ենթադրենք, 2500 կգ բեռ, դա ուրիշ խնդիր է, իսկ եթե մեկ անհատը, որն իսկապես գալիս է Ջավախքից և իր հետ բերում է 25-ի փոխարեն 30 կգ կարտոֆիլ, դա արդեն բոլորվին այլ խնդիր է: Պետք է այստեղ ուսումնասիրություն կատարենք,  և եթե օրենքի շրջանակներում կա հնարավորություն, փորձել գտնել: Եթե չլինի, ապա դա գլոբալ խնդիր է` կապված ԵԱՏՄ-ի պարտավորությունների հետ և այլ դաշտ է տեղափոխվում»,-ասաց նա:

Նա հիշեցրեց, որ նախատեսված էր 50 կիլոգրամ թույլատրելի չափ, որը կիսով չափ կրճատել են: «Ասեմ, որ ավելի վաղ 5 կգ էր նախատեսված, որը հետագայում բարձրացվեց 50 կիլոգրամի, հիմա իջեցնում է 25-ի` արդեն ԵԱՏՄ-ի պայմանավորվածություններով: 5 կգ-ի դեպքում, իսկապես, կար դժգոհություն»,-ասաց նա:

tert.am

(Visited 49 times, 1 visits today)