Բարեկեցիկ, կայուն և կանխատեսելի հարևան ունենալը՝ երկուստեք անհրաժեշտություն. Վրաստանի նախագահի այցը Հայաստան՝ խիստ ուշագրավ

Պաշտոնական այցով Հայաստան ժամանած Վրաստանի նախագահ Սալոմե Զուրաբիշվիլին Երևանում հանդիպումներ ունեցավ ՀՀ նախագահ Արմեն Սարգսյանի, վարչապետ Նիկոլ Փաշինյանի հետ։

«Մեր երկրների հարաբերությունները նոր մակարդակի բարձրացնելու պատմական հնարավորություն ունենք»,- կառավարությունում ընդունելով Վրաստանի նախագահին՝ հայտարարել է Հայաստանի վարչապետ Նիկոլ Փաշինյանը։

Փաշինյանը հիշեցրել է, որ որպես վարչապետ՝ իր առաջին պաշտոնական այցը կատարել է Վրաստան, և դա ընդգծում է Հայաստանի կառավարության և անձամբ իր առանձնահատուկ ուշադրությունը և կարևորության զգացումը հայ-վրացական հարաբերությունների վերաբերյալ: «Ընդգծել եմ, որ մենք պետք է մեր հարաբերություններում հենվենք ռազմավարական ընդհանուր շահերի վրա և ուրախ եմ, որ Վրաստանի կառավարության կողմից համարժեք արձագանքի եմ արժանացել: Հիմա ժամանակն է այդ փոխադարձ ըմբռնումը կյանքի կոչել»։

Զուրաբիշվիլին իր հերթին համոզմունք է հայտնել, որ հարևան պետությունների՝ առանց այն էլ սերտ հարաբերությունները կանցնեն նոր փուլ, և կկարողանանք էլ ավելի զարգացնել:

Փորձագետ Արմեն Վարդանյանի կարծիքով՝ անկախ այն բանից, որ Հայաստանն ու Վրաստանը տարբեր աշխարհաքաղաքական ուղղվածություն ունեն, Հայաստանին պետք է կայուն և կանխատեսելի Վրաստան։ «Վրաստանը մեր հյուսիսային հարևանն է և այնտեղով է գալիս ապրանքների մեծ մասը։ Եվ նույնն էլ Վրաստանին՝ պետք է կայուն և կանխատեսելի Հայաստան»,- «Առաջին լրատվական»-ի հետ զրույցում ասաց նա։

Վարդանյանն ընդգծեց՝ երկու երկրները շատ դեպքերում միջազգային հարթակներում աչք են փակում իրար դեմ ուղղված քվեարկություններին. «Հատկապես երբ խոսքը կոնֆլիկտներին է վերաբերում, մեր քվեարկությունները տարբերվում են։ Բայց երկու պետություններն էլ ըմբռնումով են մոտենում միմյանց աշխարհաքաղաքական վիճակին, և խնդիրը սկանդալների չի հասնում»։

Մեր զրուցակիցը հավելեց. «Չնայած Հայաստանը գնաց ԵԱՏՄ, մեզ ձեռնտու է, որ Վրաստանը որքան հնարավոր է շատ ինտեգրվի եվրոպական կառույցներին։ Հայաստանին ձեռնտու է ունենալ տնտեսապես բարեկեցիկ, կանխատեսելի հարևան։ Բացի դրանից՝ Վրաստանում Արևմուտքի կողմից արվող շատ բարեփոխումներ նաև Հայաստանի համար են վարակիչ դարձել։ Հայաստանում շատ փորձագետներ, քաղաքական գործիչներ՝ տեսնելով, թե Վրաստանն ինչպես է առաջ շարժվում, փորձում են հետևել այդ օրինակին»։

Ըստ Վարդանյանի՝ Հայաստանին ձեռնտու է, որ Վրաստանը գնա եվրոպական ուղղությամբ. «Բարեկեցիկ, կայուն, զարգացած հարևան ունենալը միանշանակ բխում է մեր շահերից»։

Վրաց քաղաքագետ Գելա Վասաձեն այցը շատ հետաքրքիր է գնահատում։ «Առաջին լրատվական»-ի հետ զրույցում Վասաձեն մասնավորապես նշեց. «Այն միևնույն ժամանակ արարողակարգային է, որովհետև Վրաստանի նոր նախագահը ոչ պաշտոնական, բայց գործող արարողակարգի համաձայն՝ պարզապես պարտավոր է այցելել հարևան երկիր։ Միևնույն ժամանակ այցը ճանաչողական բնույթի է, որովհետև Հայաստանի ղեկավարության հետ անձնական ծանոթությունը ևս պարտադիր է Վրաստանի նախագահի համար»։

Ըստ Վասաձեի՝ այցի ամենահետաքրքիր հատվածը տեղեկատվականն է։ «Մեր երկրում նախագահը հանդիսանում է արտաքին գործերի սուպեր նախարար, որի գործառույթների մեջ է մտնում Վրաստանում իրական իշխանություն ունեցող մարդկանց հետ շփումները։ Իսկ հաշվի առնելով տարածաշրջանում շատ դինամիկ զարգացող իրադարձությունները՝ սա հիմա իսկապես շատ կարևոր է,- եզրափակեց նա։

1in.am

(Visited 36 times, 1 visits today)