«Եթե»-ով չի, էլի… Եկեք ժողովրդի տեղը մենք չորոշենք. Հրապարակ

ԲՀԿ խմբակցության քարտուղար Արման Աբովյանից հետաքրքրվեցինք՝ ինչո՞ւ դրժեցին իրենց խոսքը, հրաժարվեցին Հայրենիքի փրկության շարժման օրակարգից եւ համաձայնեցին Նիկոլ Փաշինյանի վարչապետությամբ արտահերթ ընտրությունների գնալ:

«Ոչ մեկ ոչ մի բան չի դրժել, Հայրենիքի շարժման օրակարգը եղել է վարչապետի հրաժարականը եւ արտահերթ ընտրությունների անցկացումը»։ Իսկ ժամանակավոր կառավարությո՞ւնը՝ Վազգեն Մանուկյանի վարչապետությամբ:

«Մնացյալը տեխնիկական հարցեր են, այստեղ ամենակարեւոր խնդիրն այն է, որ իրավիճակը շուտափույթ հանգուցալուծվի, եւ երբ որ խոսվում է իշխանության հեռանալու մասին եւ այլն, դա պետք է արվի ամենակարճ տարբերակով, իսկ դա արտահերթ ընտրություններն են»,- ասաց Աբովյանը։ Վստա՞հ եք, որ արտահերթով իշխանությունը կհեռանա, չի գործադրի վարչական լծակները:

«Ես վստահ եմ, որ չի կարելի հապաղել, այ, դրանում վստահ եմ, եւ պետք է անել ամեն ինչ, որ այս իրավիճակը ժամ առաջ հանգուցալուծվի»։ Իսկ եթե իշխանությունը վերարտադրվի՞․․․

«Գիտեք, եկեք ժողովրդի տեղը մենք չորոշենք»։ Ես Ձեր՝ որպես ժողովրդի մի մասնիկի կարծիքն եմ հարցնում: «Իմ կարծիքն այն է, որ չի վերարտադրվի։ Իսկ հետո՝ «եթե»-ով չի, էլի, եթե վաղը միջուկային պատերազմ սկսվի՞»,- խոսքը կիսատ թողեց ու հեռացավ Աբովյանը։

Չնայած Ծառուկյան-Փաշինյան համաձայնությանը, ՀՓՇ անդամ երկու կուսակցություններից՝ ՀՀԿ-ից ու ՀՅԴ-ից երեկ հայտարարեցին, որ իրենց օրակարգը չի փոխվել՝ հունիսի 20-ին արտահերթ ընտրություններ անցկացնելու մասին հայտարարությունը ոչինչ չի նշանակում, հատկապես որ այս իշխանությունը կարող է հերթական անգամ ստել։

(Visited 42 times, 1 visits today)